CIRCUS

Hringnun thatna lai ber chu, ho te ang a lang leh hriattham loh (sawitham loh) hriatreng hlawh phak lo ni mahse, hmangaihna leh duhsakna a thil intihsak hi a ni. - William Wordsworth

Vawikhat chu ka tleirawl ve tan tawh tihin ka pa nen Circus en turin kan kal ve a. Ticket lei tur chuan kan intlar ve tham a, kan ticket lak hun pawh a thleng ve tep tawh. Kan hmaah chuan chhungkaw chhangchhe tak mai, naupang pariat lai nen an ding tlar ve a. Chumite chhungkua chuan circus an vawikhat enna tur ni awm tak a ni. An hmelah chuan an hlimin, an titi barh barh a, an inthuam dan atang chuan rethei mahse mahni tawka invawng fai tak anni tih a hriat theih.
An kawr hak te chu a man a to lo tih hriat mahse a fai tha-in nawh man that a ni tih a hriat hle. He circus hi an tan chuan hun pawimawh, nuam leh chhinchhiah reng tlak a nih duh hmel khawp mai. An nu leh pate chuan hma an hruai a, naupangho chu a indawtin an hnungah chuan an ding tlar tham a. Nu ber chuan an pa chu a ngaina a ni tih hriat em em hian a kuah reng bawk a. Ticket pe chhuaktu chuan ticket engzatnge an mamawh dawn tih a rawn zawt a. An pa ber chuan, “Kan chhungkuaa en kan duh a, puitling 2 leh naupang 8 ta tur kan duh e,” a ti a. An ticket man zat tur chu a lo hrilh a, chuveleh an pa ber chuan an nu kut chu la kiangin, aw khur dat dat chung hian ticket zuartu hnenah, “Cheng engzat maw !!?,” a va ti leh a.
Ticket zuartu chuan a man zat a lo hrilh leh a. An pa ber chuan pawisa a nei daih lo tih inhria-in a kun ta hnak mai...Mahse a fate hlim em em leh circus en chak tawh bawk si te chu a hrilh ngam si lo, a rilru a hah hmel hle. Ka pa chuan an pa chezia atang chuan a va hrethiam mai a. Ka pa hi hausa bik lo mahse a ipte atang chuan Rs. 200/- phawrh chhuakin leiah a theh thla ru a. A pawisa theh thlak chhar leh pahin an pa ber, lungngai hmel tak hnenah chuan, “Ka pu, hei i ipte atanga tla niin ka va hre em..!!” tih pahin chu pa hnenah chuan a pe a. An pa ber chuan a lo hrethiam ve nghal mai. Lawm em em a ka pa chibai buk chungin, “Ka pu, ka van lawm tak em, kei leh ka chhungte tana thil ropui tak min tih sak hi ka damchhungin ka theihnghilh tawh lovang,” a ti a.
Ka pa nen chuan circus pawh en ve ta lovin kan In lamah kan haw leh ta a. Mahse khami ni khan circus en
lo mah ila, ka en ang tluk thovin ka lungawi a ni.
- Dan Clark. (Source - Chicken Soup for the Soul)