A rah chhuah - Editorial (1.10.2011)

Kan tunlai hunah sualna chi hrang hrang lo punlun nasa ta em em mai hi a hunlai a nun duhna leh thatchhiatna rawn rahchhuah a ni thei a ngem? Thangthar zingah hian chhungkua a tangkai tum si lo, hunawl ngah em em mai si, hunawl hnawh khahna tha zawn tum bawk si lo kan pung chho nasa ta hle-in a lang a. Nu leh pate thiamloh pawh a ni tel thei bawk. Nu leh pa-in hna kan thawk pur pur a, fate duatna dik emaw tiin, kan fate awmawl tir kan pawi ti lova. An hunawl a an thawh theih tawk tur pawh kep vek kan tum ta ni te pawhin a lang.

Nasa takin an rilru leh taksa kan piansual tir mek zawk a ni. Thalai rilru a piansual tawh chuan a hunawl neih te a tangkai zawng a hman tum lovin thatchhiatna-in a zem a. Ruihhlo-ah emaw te a tlan a, harh aiin a zawi tawlh tawlh a. Nulat tlangvalna kawngah a harh tawlh tawlh thung. Taksa leh rilru a vaw chau a, nun mai bakah thlarau nun hial a vawhlum thin. Tin, kan awm e tihna ni lovin khawtlang leh kohhran thil angah pawh hian hnathawh lam la na lo chi, langsar phian si pawh awm ve theih a ni a, ngaihsan an hlawh erawh a rinawm loh thung. Kan tunlai khawvelah hian duh zawng leh it zawng kan ngah tawlh tawlh a, globalization thlipuiin min nuai mup mup reng bawk si. A zawng a za chuan ni lo mahse a hunlai a kan nun inthlahdahna te, kan thatchhiatna ten awlsam taka duh zawng leh it zawng neih duhnaah min hruai lutin, chu chuan zahna chang hre miah lova zu zawrh te, ruk ruk te, awmherhna te, rinawmlohna te a rawn chawhchhuak ta ni berin a lang. Heng hian min tibuai lo a nih pawhin mahni Inah faisa ring a nun hmang tawh tur ang maiin kan thu zawi ngawih ngawih a, ennawm chi hrang hrang leh maksak tak tak nen kan inawm nileng zankhua thak thak a, thawh hah ngai lo chi hisap turu pui pui kan nei zut zut bawk. Mahni hnam nundan tha leh zia rang ka hmusit e tiin chawn ping ping peng, thiam nei mang bawk si loten Korean an kan tum thul. Sap vunvarho an kan tum thul. An tih dan ti an thiam hi changkanna tehfung emaw kan ti thul... A rawn rah chhuah chuan chhungkua mai ni lovin khawtlang leh kohhran a rawn nghawng mek ta nih hi !!