Ram hmelma a ni

By Chawnpuipar

     Zoram thalai zawngte kan in sum theihlohna leh, kan ram tlukchhiatna bul leh Mizo chhungkuate tlakranna bul chu Ruihhlo a ni a, Ruihhlo avanga nunna chan chu sawi loh, Ruihhlo ve mai avang hian in chhungkhur leh kan tu leh fate thleng pawha malsawmna kan tlansan a, phurrit kan siam hnemzia chhut hian Zoram hmelma chu Ruihhlo a ni ngei a lawm.

      Ruihhlo hian Zoram min run mek a, Mizo mipui lah chuan kan tlansan thei silo, a bik takin Mizo thalaite hian kan ram hmelma hi kan hre mawlh lo. Kan haider a, kan um lui zel a, kan ngai ngawih ngawih a, min tihchhiat nasatzia hi kan haider lui tlat zel zawng a nih hi.

       Ruihhlo avanga nunna chan thailai rual, ruihhlo avanga mahni kutke pawh hmangtha thei lo thalai rual, ruihhlo avanga mahni tuina zawng pawh ti thei lo thalai rual tam lutuk hian nakin lawkah hnam dangte nuih kan tiza zual zel dawn niin a lang ta, kan harchhuah meuh chuan khua a tlai tawh anga, in siamthat kan tum meuh zawngin kan tuarna a nasa tawh lutukin a rinawm hle bawk.

        Zoram hi kan ram ani a, kan hmangaih tur a ni a, kan hmangaih ngawt tur a ni lo a, Zoram hmasawnna tur daltu kan nih leh nih loh kan inenfiah nghal bawk tur a ni. I tu leh fate’n an nunah hma an sawn loh chuan Zoram hmasawnna daltu i ni chiang hle bawk ang.

        Zoram siamthatna hna chu i chhunga cheng mipuite kutah a innghat a, a bik takin thalai rual kutah ram hmasawnna hi a inthlung nghet bik a ni. Ram hmasawnna daltu mai kan nih chuan Zoram hian min la hawisan ve ngei ang le.