Kha nula kha...

 By Lk tenten

 Tlai dar 5:00 a chhuak daih tur mah ni ila, Motorte a tam tawh avangin Traffic Jam an tih mai a nasat thin avang chuan dar 3:00 chuan City Bus ah chuan Thuampui kawn pan chuan ka chuang phei ve ta a.  “Zan tlan turte kan ni a, tu tak thutpui ang maw? Nula chhelo tak thutpui ila zan pawh a tawi phah mahna” tih te ka ngaihtuah mai mai a. Rin aia lirthei veivak alo tam loh tak avang chuan Dar 3:30 vel chuan ka thleng phei ta mai si a, Bus kal hun tur nghakin ka thutnaah chuan ka lo thu a, duhthute ka lo sam a, Zoram thalai nunzia te ka ngaihtuah vel mai mai a.

 Rei tak chutia ka thut hnu chuan mi pawh an lo thleng ve nual tawh a, “A tu ber chu nge ka thutpui tur ni dawn aw” tiin ka lo thlir hlawm a. Nula, sanglam ria deuh sam seihniang mai hi a thutna tur zawnga Seat no ena akun lai tak chu ka va hmu ta a.

 A sam sei hniang mai chu aw…. Nipui lain khawi emaw lai phulrai hmun nuam tak thing thelh sung mai karah han thutpui ila, thlifim lo thaw in han chhem leng siau siau se la, nghawng leh hmai a rawn zam vel tur kan ngaihtuah a,.. ka in thing deuh nawk a. Chutah a rawn hawi chhuak mitmeng mawizia chu… a fiahfim kak mai a, a mitmu varlaite chu ke khawvel tenawmna leh harsatnain ala bawhbuai ve loh naute pianghlim mit ang mai a var mawi; Chutah le a mitmu dum tliang tak, a melh apiang an tuiral ang tih tur ngei mai chuan min rawn melh zeuh mai chu… ka terk chuai a, ka mur chum chum ni mai hian ka hria. A rawn dah chhuah leh min rawn en phei inkar tak mai kha tv leh video a chhuah chu ni in, athu pha chin han ni bawk ila chuanin, slow motion an tih mai ang khan  vawi 2 vawi 3 mai nilo 20/30 ka hawi nawn tir ngei ang le. Mahse, Tv leh Video a en mai ani silo, atak ngei anis i a.

 A hnar ngul kan en leh a, milem ker thiam takin aduh ang tawka a chher mam hnu, angai angina siam leh rawh pawh tise a tluk a mawi athiam tawh lo ang tih khawpa mawi hian a mitmeng mawi tak pahnih inkarah chuan a invuah thla zaih mail eh zel si…

 A heh mawlh mai hi ani, tunlai siamchawp man to tak taka tih sen ni lo hian, avamin a vam ham mai a. Chutah duhthusam ai maha mawiin an nuisaka, “Hei bak bak a duhaisam sakhmel a awm dawn em ni” ka ti rilru vawng vawng a. Ka bula thu tur kan ni mai sela chuan aw, a muhil lai hmel pawh ka thlir zankhua peih tih chu tuma zawh ngailoin ka inhre ru kiau mai bawk si.

 Thilmak a thleng chu anisilo, lehkhabu ziak leh thawnthu phuah mitten an lo ziah thin angin ka bula thu tur lah alo ni tak tak mai si. Naupang chhawlhal takin tui ain khawlh khawlh ang mai hianin a hmel taka en chung chuan ka chil ka lo lem dek dek mai anih chuh.., inti bengvar leh inla fel tak mai chuan athutna tur chu kan beng fai a, “Lunglei thleng ve tur ami inih?” tia ka zawhna min chhanna aw ri mawi zia leh atawnglaia aha lo lang rual leh var mawi tak maite chu kuhva han she hmawrh hmawrh chi anihloh bakah tuibur, sahdah ilo ahmuam ngailo tih ati lang chiang ngei mai. Chu nula chu Zawlkhaw tleitir nilo, Chhaktiang Chhawkhlei pawh niloin, Leitlang Dingdi ngei mai alo ni si a.

 “Tawlh teh thianpa” tih tawngkam leh ri chu adang ta zak mai, a hmaa aw ri ngaihno bei leh dam diai mai kha ani hauh lo nia maw le; Ka meng kawk a Bus tukverh ka lo bawh veng veng mai niin, tawlh pah chuan ka bula thu chu kan en nghal a,.. “E khai aww…”.

  A pian lah chu Utawk puar taka athu hle hle ni awm a mawi hi alo thu vum nghal hnawk mai a, ngam leh ngam lo va ahmel kan en chu, “ Tu tak chu insual puiah cho ang maw, atuk zinga lo dawngsawngtu nih ka va han hlau em” ka ti rilru a.

 Tlangval tunlai tak leh nula en reng reng pawh a duh duhin kuak kawih her theih niawm alang hian a thuamhnaw anlo dahsak mek a, anni pahnih lah chu titau tih hi an hmelah chuan alang reng mai a. Rum taka melh pah chuan tlangval chuan “Ka sual tawh ngawt ang” ala ti zui a, nula zawk lah chu zial peh kawh lah pah chuan a hawi fi hmak mai bawk a. Nu chuan “Khua ava han var lo tak em “ a ti zui a.

 Kha nula kha aw.. suangtuahna kawm pahin tuna mi nula leh tlangval nen kha chuan an mizia ava in anglo tak em!! En ringawt pawhin mipangngai tan a hai loh tur khawpa mi awm herh a taka ka hmuh lain, suangtuahna ramah erawh chuan duhaisam en mai pawha veng chhung pawh nilo khawkhat nula hmeltha fell eh rinawm tih hriat reng ka lo kawm si; A tak lamah chuan hmuh tur an va vang dawn em! Ka bula thu chu kan en a, a rilru hah lutuk hmel chu ka khawngaih khawp mai a, chhungkaw thil anih hmel bawk si a, engmah ka sawi ta lo va.

 Aw, kan ramah hian hetiang ang hian nula tlangval engzatin nge nu leh pa tan phurrit siamsak ang; nu leh pa eitur neih that loh vang pawh nilo hriselna that loh vang pawh ni chuangloa, chhungril khawsikpui(rilru natna) vei an va tam tawh em. Thalaite kan in en chian chu ahun ta hle mai.

 Pathian leh kan ramtan kan ti, pawnlamah Kristian ram kan ni kan ti a, kan nunah hmuh tur a awm chuang si lo. Zawi zawiin kan ram chu chhungrilah a ngetin aei chhe mek anisi a. Antam pawh tui pek thata abul hnim kan thlawh fail oh chuan, hnimin adip ria zova ahnah a kauraua athi thuai mai thin si a.

 Chhantu leh enkawltu tha kan va mamawh em!! A mawhphurtu chu ka ni, keiin ka thenfai lohin tunge thianfai a, tui peta ang le.. tiin mimal tin hian ngaihtuahna chang hria sela atha tur .. tithe ka ngaihtuah mai mai a.