Sihphir, 12th November : Hunrei tak atanga ruahmanna lokal pui tawh ‘Sikni Eng Kut’ chu tunkar ningani khan Sihphir Playground-ah Zo thuam chikim nen ropui taka hman zawh a ni ta. Sikni Eng Kut hmangtu mipui thahnem tak kalkhawm te hian nuam an tiin, chanvo neitu tura ruat te pawhin an chanvo theuh an hnehsawh hle vek a, mipui mit leh beng a fahin, an kham lo tlang hle. He Sikni Eng Kut hi Pu R Lalrinawma, Bialtu MLA chuan ‘Kut Pa’ ang a hman puiin, nilengin a thiannu nen an awmchilh bakah cheng 60,000/- man hnathawh tur YMA a pek thu a puang nghal a ni. Tin, I&PR Department atangin Pu Lalfamkima, BSO in min rawn hman pui bakah Tuarpuii leh Suna ten show min rawn neih sak bawk. VCP Pu Zaneihthanga hovin VC member te leh School zirtirtu te, NGOs a kan thawhpui te pawhin nilengin min uap a, a lawmawm tak meuh meuh a ni.
Zing dar 10:00 pelh hretah Kut Pa Pu R Lalrinawma, Bialtu MLA hian Kut a hawn hnuah programme duan sa anga hun hman chhoh zui a ni a. Mipui pawh Zo thuam famkim nen an pung khawm tam tial tial a. Sihphir Playground chu a parin a par bung a ni ber e. Culture & YMA Chhang Sub- Committee leh Sihtlang Culture Club lamin theihtawp chhuah a Sikul hrang hrang naupang te hnam lam an zirtir rah chhuah a lo lang a, ropui takin hnam lam chi hrang hrang an show te chu a hmuhnawm tak zet a ni. An zirtirtute pawh an fakawm tak zet zet. Show chi dang dangah Culture & YMA Chhang Sub-Committee lam pawh ropui takin an che na hle a, anni hian hneh takin chanvo neitute control hna an thawk tel nghal bawk a ni. YMA Zaipawl lam pawh an zai thiam hle.
Hetiang ang show chi hrang hrang, ropui tak tak leh hlimawm tak tak, mi chi hrang hrang hawl kim si hi Sihphir mipuiten kan la tawng ngai lo. Sihtlang Culture Club in thiam leh ropui tak a Cheraw an entir te, MHIP in Zo tak a drama hmuhnawm tak an entir te, MUP lamin thangthar te hmuh phak tawh loh hla do chham an entir te, Sihphir Higher Secondary School in ‘Zawlpala leh Tualvungi thawnthu’ thiam taka an chan te, Malsawmpuii d/o Pu
Lalfingvara, Dinthar Vengin thiam tak maia ‘Laldanga Zai’ a sa te, Little Buds School, KGs zirlai an han chheih vel
te, mipui hmui tikautu Tuarpuii te leh Tv David Lalrinawma te, zai a mipuite awitu - Nl Zomuanpuii te, Tv Andrew
Lalnunthara te bakah YMA Chhang lam atang a zai - Ngursiami leh Zorammuani te chetla zawng zawng mipuiin an lawm hle vek a ni.
YMA Sections te pawhin ropui takin an chanvo theuh an ti hlawhtling thei a. A bik takin Costume Parade show neitu Chawngbawla Section te an che puiin, Lammual hiala zu show atan a itawm tak zet zet. Section intihsiakna -Kalchhet kal leh Kawikah pawh a hlimawm hle. Programme kan kham lo tlang e. Tin, sponsored tu leh donation
min petu mi enge maw zat an awm bawk a, an chungah YMA a lawm hle a ni.
No comments:
Post a Comment