CEC/CCC thu khawm : Tunkar thawhlehni khan YMA General Conference 2011 zawh hnu a a hmasa ber atan Central YMA hnuaia Committee sang Central Executive Committee (CEC) an thukhawm a. General Conference neih zawh tak thlir letna leh tunkar nilaini a CCC thutkhawm tak thlir lawkna an nei. CEC hian inkhawmpui programme rei lutuk thin chu tih tlem deuh nise. Chubakah mipui chanvo tam zawk dah ni tawh se tiin rawtna an siam. Hei bakah Conference thlengtu Kolasib inbuatsaihna tha an tih rualin palai kal an tlem deuh erawh pawi an tih thu an sawi lang bawk. CEC hian Central YMA hnuaia ding tur sub-Committee 18 a Chairman leh Secretary tur te an ruat fel nghal. Tin, CADS member tanglai te term tawp tawh mahse midang ruat leh hma chu tun a nilai te hian chanvo lo keng tlang se an ti bawk. Tunkar nilaini khan YMA hnuaia thuneitu sang ber Central Co-ordination Committee (CCC) vawi 67-na an thukhawm bawk a. Kan Branch aiawhin Tv Zohmingliana Hnamte, Vice President a tel. CCC hian Conference thlir letna te, thurel bawh zui dan tur te an rel a, tlaiah zanriah an kilho nghal a ni.
TLAWH:Sihphir Branch KTP chu Dt. 19 & 20.11.2011 (Saturday & Sunday) hmang hian Kolasib Diakkawn Branch tlawh turin a inpeih fel ta. Member kal tur a inpe zawng zawng mi 108 lai an ni. A kal turte duhsakna kan hlan rualin Sihphir hming tichhe thei zawng a awm lo turin kan beisei e.
Ui Chhar:Ui chhar a ni a, a neitu dik tan dt.19.11.2011 ral hma ngeiin Pu Kapthanga, Neihbawi hnenah lam theih a ni. Ni tiam chin a ral hnuahah chuan engtiang pawhin lo ti ral se engmah sawi buai a theih lovang.
Tui Pump i dim ang u: Thlasik rim a na chhoh zel rualin tui pawh a kang nasa chho hret hret zel a. Mipui tam zawkin tuikhur aiin khawchhung Tui pump hrang hrang te kan la chhawr nasa zawk rih niin a lang. Kan tui pump hman thin te hi khawl chhe hma a niin, dim tak a hman i tum hram hram ang u.
No comments:
Post a Comment