Sihphir, the 1st October : Sihphir Branch YMA in Branch tha tichak tura Sub-Committee a din te zing a mi ‘YMA Evangelical Cell’ chuan kumin chhung a hmalakna tur an chhawpchhuah te zing a mi ‘Fahrah enkawlna Home’ tlawh nise a tih chu kar kalta September ni 24, inrinni khan ti hlawhtlingin Hermon Children Home, Durtlang leh Hmangaihna In, Durtlang te tlawh a ni a. YMA hmingin thilpek chi hrang hrang hlan an ni. YMA Chhang lamin special items nen an tawiawm bawk.
He hun va hmang tur hian YMA Evangelical Cell member 50 zet te chu Bus 1 leh Taxi bakah two wheelers hmang a va thawh phei a ni a. Evangelical Cell Chairman Pu Robert Lalhmachhuana 207 motor in tanpuina thilpek tur te, YMA Sound System te phurh phei a ni bawk. Hermon Children Home-ah hun hman hmasak a ni a. Chawhma dar 10:45-ah Pu Robert-a, Evangelical Cell Chairman kaihhruaina hnuaiah thilpek hlanna inkhawm tan a ni. Tv Lalremruata’n hunserh hmangin, Pu C Lalremruata, Secretary, YMA Evangelical Cell in report a pe bawk. Hemi zawh hian he Home Superintendent Pu Lalrosanga’n Home din chhoh dan leh an kalphung te, naupang an lak dan te report a pe ve leh a.
Chumi zawhah Pu HV Lalhranglian, Branch YMA President i/c Evangelical Cell in thuchah tawi sawiin, a sawi zawh hian Home tanpui nan Iskut bag 4, mipa leh hmeichhe kekawrte hak 120, hmeichhe kawrhnuai hak 45, tooth brush pair 150 a hlan zui nghal a ni. He inkhawmah hian Nl Zomuanpuii te, Nl Lilyparmawii te, Nl Lalrinmawii te, Tv Andrew Lalnunthara ten Pathian fakna hla mawi tak hmangin kalkhawm te an awi reng bawk. Nl Zomuanpuii phei chuan Home tanpui nan hian ama pocket atangin Rs 500/ - a hlan nghal nghe nghe. Tichuan Home a enkawl mek fahrah naupangten item hmuhnawm leh awmze nei tak an entir a. Heti lam atangin YMA Chhang naupangten ropui leh mawi tak maiin ‘Zo Lam’ tum hnih an entir bawk a. Home naupangte hian hmuhnawm an tiin, Superintendent Pu Lalrosanga phei chuan zir ve an duhthu a sawi hial !! (YMA Chhang Sub-Committee lamin an la ngaihtuah turah ngai ila). Darkar 2 vel hun hman a nih hnuah home naupang 120 te nen helam atanga ken theitui leh chhang te eihovin, hlim takin a tualah thlalakhona te neih a ni. Hermon Children Home a enkawl lai naupangte hian rilru an khawih em em a. Hmeichhe thenkhat te phei chuan mittui an hru fap fap hlawm. Tichuan, chawhnu dar 1:30 pelh hretah hnukulh teuh chunga in bye bye chungin Hermon Children Home hi chhuahsan a ni.
Chawhnu dar 2 pelh hretah ‘Hmangaihna In’ thlen phei leh a ni a. He hmun a naupang 23 enkawl mek te hi naupangchhia leh nausen te an nih hlawm avangin a hlimawm lam programme hman a ni ve ta lo. Thilpek hlanna inkhawm tawite erawh Pu HV Zaliana, Evangelical Cell Vice Chairman kaihhruaina hnuaiah neih a ni a, tawngtaihona te neih a ni. Hmangaihna In tan hian Iskut bag 2, blanket te 4, naupang ball pet chi 11 leh thawmhnaw te hlan a ni. An hmunhma leh a te zual an dahna te fan kual a niin, mittui tla an tam hle. Hunrei tak hman a ni lova, thlalakhona te neiin, tlai dar 3 velah rawn chhuahsan a ni.
Heng fahrah enkawlna home tlawh nan a sum leh pai, tha leh zung seng a min tanpuitu Sihphir mipuite chungah Sihphir Branch YMA chuan lawmthu a sawi tak meuh meuh a. Pathianin a let tam takin malsawm theuh che u rawh se. YMA Evangelical Cell rawngbawlna kalchhoh zelna turah pawh mipuiten min thlahthlam lova, min tawiawm chho zel turin kan ngen nghal che u a ni e.
No comments:
Post a Comment