Thuhmahruai : Dt. 6th - 12th September, 2011 chhunga 7th CEM Invitational Football Tounament-ah Sihphir FC te chuan Champion nihna changin hlim takin kan lo haw leh a ni a. He mi kan zin report hi mi tam takin kan hre chakin ka ring a. Thiam lo deuh tak chungin ka han ziak lang ang e.
Lawmthu : Lawmthu leh lawm vak lohna thute hi sawi hmasa ila tha ang. A bul berah chuan min vengtu Pathian hnenah kan lawm em em a. Tin, keini Sihphir FC te hi hunrei deuh hlek tawh khan sawmna kan dawng tawh a; mahse Games and Sports Association lam atangin pawisa kan neih miau rih loh avangin hmalak vak ngaihna erawh kan hre lo hle. Kan hruaitu ten kan veng officer leh office-te dawr kualin kal theih hram dan kan han ngaihtuah zak zak a. Tawngkam tha tak tak hmu mah ila a pawisa ber kan hmu thei miau si lo va, lu a hai hle. Kan officer ten ngaihthat thlak tak takin min han thlah a, kan lawm em em a ni. Chutihlai chuan, pakhat ve thung chuan a melh pawh min lo melh tha duh lova, TV min thlir san daih mai ! Tawngkam tha pawh kan hlawh lo. Kan hruaitu dang chu an lungawi tho mai thei (kei chuan ka hre rei viauin ka ring). Kan VC ten pawisa fai Rs 1500/- lai min pai a, kan dil chawpchilh tehlul nen min tihhlawhtlin sak a, kan lawm em em a ni. Chumai bakah, YMA te nen tang tlanga min lo hmuak te kha a ropui kan ti tak zet a ni. Kan YMA ten phur taka min lo dawngsawng te, kan chanchin min lo ngaihven reng te kha a ropui kan ti a, kan lawm em em a ni. Tin, Pu Lalzarliana, kan GSA President-in kan mangan tawpah a pawisa min hman tir a. Ani vanga kal thei chauh kan ni a, an chhungkaw chungah kan lawm hle. Pu Lalrinliana Royte leh Pu R. Lalduhzuala ten pawisa faiin min pui bawk a, kan lawm em em a ni. Kan Coach Pu Gosen Rammawia a kal theih nan a hma min lak puitu Pu C. Chhuanawma (Pu Vala), BRC hnenah thinlung takin kan lawm bawk e.
Kal Kawng : September ni 3, Inrinni zing dar 8:30 velah Sihphir atangin kan chhuak a. Kolasib-ah tukthuan kan ei thla a. Kolasib atangin kan players tur mi 2-in min rawn belh a, chawhnu dar 3 velah Silchar kan thleng. Chawl miah lovin motor hranah kan inhlang leh sawk sawkin kan tlan leh nghal char char a, kawng a chhiat tawh avangin kan tlan sawt thei lo hle. Kei phei chuan kan thleng thei dawn tawh lo emawni ka ti hman rum rum mai !! Zan dar 9 ah a hmun kan thleng a, organizer ten min lo hmuak a, vawksa tui tak min hmeh tir hnuah kan thlenna turah min nghat a ni. Kan awmdan : Kan thlen tuk hi Pathianni a ni a, vai style a breakfast kan eikhamin keimahni chhungah kan inhmelhriattir hlawm a. A duh duh tan hun rei vak lo lenchhuahna hun kan hawng a, tlaiah a huhoin inkhel kan enin Tournament chu an lo khel mek a. Keini hi Quarter final lut sa-ah min dah avangin midang inkhel kan en thin a ni. Zan lamah kan infuih a, devotion kan hman hnuin kan mu. Hemi zan hian kan naute thenkhatin “Thlahrang emaw ramhuai emaw a awm” an ti a, mu tha ngam meuh lo kan kawl nual mai. A hnu lamah engmah phei chu kan tawng zui lo a ni awm e. Zan tin hian Pathian hnena inhlanin devotion kan inhman chhawk thin a. Final kan khelh hma zan phei chuan kan zavaiin kan tawngtai rual nghe nghe a ni. Kan players te an discipline a tha hle mai a, tihtur leh tih loh tur kan tih a piang thuawih takin an zawm vek zel a, kan lawm em em a ni.
Champion kal kawng : Kan khelh hmasak ber hi Quarter final match hmasa ber a ni a. Avalanche Club, Kokrajar kan khel. An ni team hi hman kuma kan hnen hnu tho an ni. Ruah a sur avangin ground a nal em em mai a, duh angin kan khel hlei thei lo chungin 2- 0 in kan chak. Kan chawl leh vang vang a, Semi Final-ah an Local Club tha, Hmar ho tan rawn Evergreen kan khel leh a, he game zet hi chu kan hre rei hlawm khawp ang. Team tha ve tak an ni a, hmun hrang hrang atangin players te an lo chahkhawm ve bawk nen, thlirtu mipui sang tam tak hmaah kan inkhel a, game tan phat atangin boruak a sang nghal et awt hle. Kan players te hmun tin maiah an let tawp tawp reng mai a. Keinin Football kan khel a, anni ho chuan in khelh a ni ber e. Ball awm loh hnuah mi an pet let tawp tawp reng mai a, Referee in game control nan Card a phawrh ngam bawk si lo. Kan players te mawi taka khel turin kan duh a, thinrim ve lo tura lo fuihtu a pawn lama lo awm te hi kan thinur tlawmngai lutuk mittui a lo tla tep zel a ni. Referee hian keini ho chu card min la pe lo chauh zui. Lehlam pawl a hlauhtlawn vang ni maw...
(Karlehah chhunzawm a ni ang)
No comments:
Post a Comment