CHANVO.
Pawl hrang hrang kan tam hle mai. A hman pawh kan inhman pawlh nasa a, mi pakhatin chanvo tam tak kan chelh kawp ten tun thin. Thenkhat chuan ropuinaah an ngai a, ropui intihnaah an duhtawk a. Thenkhat chuan hnathawh kawr haknaah an ngai a, theihtawp chhuahin an mawhphurhna hlenchhuah hram hram an tum thin. Chanvo aiin a mawhphurhna ken tel hi a pawimawh zawk.
Chanvo chelh teuh hi mite zah kaina leh ropuinaah thenkhat chuan kan ngaih thin vang ni maw, mawl deuh zawk te hmuh thiam ve phak loh turin a ruk a kherh dan te hi an thiam a, an kawng dal theitu tur nia an hriat te chu thiam taka phiah fai an tum thin a, a tuartu awm dawn mahse pawi an ti phal ngai lo. A nghawng chhuah a chhe thin khawp mai. Khawtlang huap pawlah a ni emaw, Kohhranah a ni emaw, mi pakhatin chanvo pawimawh chelh teuh lova insem zai thiam te hi a va pawimawh em ve aw !! Mawhphurhna-in a turchhuah theih, mi inthup si, mi tha tak tak hi an awm furin a rinawm si a ni.
Chubakah midangte chherchhuahna remchang a ni dawn si a. Chutihrualin chanvo te hi lawm taka pawmtu nih mai a tawk lova, pawm mai piah lamah thahnemngai taka mawhphurhna hlenchhuah tum a tul thung. Awm leh mawi pawh dawn zo lova chanvo leh nihna chuh ru huam huam mai thin kan nih a, a nuam chin leh langsar lai chauh va thawh tum, thawk tak tak si lova kawk kualtu ber a tang thiam si kan nih chuan miten a rukin min hre dawn tho va, rin kan kai ngai chuang lovang. Pawl hrang hrang hian thil tum a nei a, thil tha a ni tlangpui bawk.
Chu a thil tum tihhlawhtling tur chuan taima taka thawh a ngai a, tisa tak pawh a hruaitu thatchhe tan hlenchhuah harsa lehzual tak a ni thung ang. Mi pahnih khat thahnemngaihna leh taihmakna mai hian thil tha a herchhuah pui zo lo fo va, taima taka tanho thiam hi a pawimawh tak zet zet. Bible a Pathianin a rawngbawl tura a koh te hi mi thatchhia an nih kan hre ngai lova, mi buai tak vek an ni. Chuvang chuan hruaitu thatchhia, chanvo chelh tun si te hian rah tha kan chhuah thei ngaiin a rinawm loh.
No comments:
Post a Comment