Zirtirtute Ni (Teacher’s Day) pawh kan lo thleng leh dawn ta a. Hnam fing leh ropui a piangin Zirtirtute pawimawh zia an hria a, zah pawh an kai hle reng a ni. An hna hi a pawimawh , a sap tawng takin zirna in a tum chu “All round Development” a ni tawp mai. Mihring nunchher puitlin nan he zirna hian ramri kham chin a nei lo a tih theih ang. Syllabus thiam tir leh pawl an sawn theih nana passed tir tumna piah lamah he all round development hian “Be a man..Be a women” ni tura kawng kawh hmuh leh an nun sawizawi hi ril takin a kawk tel bawk. Zirtirtute pawimawh zia hria-in veng tam tak chuan an nunchang pawh an duh fir sak hle. Zirtirtu nunchang mawi lo te, zirtirna kawng a inthlahdah te hian zirtirtute zahawmna nasa taka a tihchhiat theih thin avang te, naupang nunah nghawng tha lo tak a neih theih thin avangin zirtirtute hi fimkhur a ngai khawp mai. Zah tlak a nun hman a pawimawh tak zet. He zirtirtute ni lo thleng tur atang hian zirtirtute hian an mawhphurhna san zia, thlarau nun hial nghawng phak a nih zia hre thar theuh se. Tin, he khawtlang nunphung a zirna boruak hniam lutuk leh competition awm thei reng reng lo mai te, Board exam leh degree course results vel a topper kan awm mumal ve thei lo te, State services - MCS, MPS leh competitive exam dang a tling ta han sawi tur kan awm lo reng mai te hian zirna kawng a kan hmabak ngah zia min hriat thar tir se. Chubakah nu leh pa te pawh kan harh thar a tul bawk. Kan faten nitin zirna Sikulah hrem an lo tawk a nih pawhin a dik a dawk thlu lova fate bul a an Zirtirtu sawichhiat bawih bawih te hian rah tha pakhat mah a chhuah lo tih te hre thar ila. Hrem ngai a an awmna chhan kha siamthat kan lo tum ve zawk tur a ni. Tin, kan inchhungkhur environment theuh hi kan faten tum nei a zirna chhunzawm chak zel theih nan kan adjust thiam ve zel pawh a pawimawh ang. He Teacher’s Day lo thleng tur hian khawtlang mipui, nu leh pa, khawtlang hruaitute leh tlawmngai pawl, Kohhran tin te pawh hi min chhem harh theuh se. Kan khawtlang nunphung hniam lutuk a zirna boruakin rah tha a rawn chhuah theih nan mawhphurhna sang tak kan nei theuh a ni.
No comments:
Post a Comment