SAWIREMTLANG

ZIRTIRTUTE NI - (Teachers’ Day)

- Lalrema, Vice President, S.T.A

Zirtirtu te ni kan lo hnaih leh ta, kar leh thawhtanni (5th Sept 2011) a lo ni leh ta reng mai. He ni pawimawh tak hi India ram President pawh lo ni tawh, Dr. S. Radhakrishnan pianni September ni 5 denchhen a hman a ni. Kum 1962-ah hman tan a ni a, kumin hi hman a nih kum 50-na, Golden Jubilee a ni ang. He ni-ah hian naupangten an zirtirtute an chawimawi nan thilpek (present) an pe thin. Zirtirtu pension tawh te pawh an zirtir naupang lo ni tawh ten thilpek hlu tak tak an la pe ve fo thin. Tin, zirtirtute pawhin he ni hi inpek thar lehna ni atan an hmang bawk thin. He ni lo pian chhuah chhan Dr. S. Radhakrishnan hi kum 1888, September ni 5 khan a lo piang a. Zirtirtu ropui, mite rawngbawl tu rinawm, mithiam, mifing, India palai rinawm, mithiam hmingthang leh zahawm, mihring te chunga hmangaihna lantir thintu leh mitin a lian a te, ang khat veka en thintu a ni. President a nih hnu-a a thiltih langsar hmasa ber chu a thla khat hlawh tur Rs. 10,000/- chu Rs 1,900/- ah a ti hniam a ni. Khawvel pum a India ti hmingthatu leh tizahawmtu a ni a, amah anga mahni mihringpuite tan a inhmang zo hi an tam lo hle ang. Mihring ropuina ber chu sum neih tamah ni lovin an damchhung a dikna leh thatna lama hun hmang tam a piang hi an ni zawk a ni. Zirtirtu, natna khirhkhan tuarte tanpui nan pen leh key chain te naupangten an rawn zuar dawn a, tlawmngaih chhuaha min lo lei sak turin kan ngen a che u. A tawp berah chuan zirtirtute hi Ram leh Hnam siamtu te kan ni a. Vawiin-a kan zirtirte hi naktuka ram leh hnam hruaitu turte an nih avangin thahnemngai takin i thawk ang u. He Teachers’ Day lo thleng tur hi inpek thar lehna niah i hmang ang u. Zirtirtu chu Zirtirtu a ni si a.