SIHPHIR THALAI INFIAMMI TE KA KHAWNGAIH

SIHPHIR THALAI INFIAMMI TE KA KHAWNGAIH
Vanlaltluanga.

Kei hi misual deuh mai niin ka inhria, mi ti lawm zawnga thuziah leh sawi ai chuan mi rilru tina leh an huat zawng deuh tak a sawi hi ka hrat riau mai a. Arpu Maawm-a leh Hriata hian an hrechiang ngawt ang. A tha lo tih chu ka hria,
ka chhungte pawn min hau fo mai, sim lah chu ka tum der lo lehnghal a, a zialo khawp. Tunah pawh hian tu huat zawng tak emaw chu ka sawi leh pek ka ring, mahse ka’n ti teh ang, i rilru a lo khei deuh pawn he mi mawl tak hian ‘Sihphir khua hi a theih ang tawkin a lo hmangaih ve ni maw’ lo ti mai teh u’n.
ENGMAH THIAM LO VAL : Kei hi infiamna lamah hian ka nep khawp mai tih hi ka in hrechiang a, naupan lai tang pawn eng infiamna mah hi ka thiam zawng a awm lo tih pawh ka hria. Mahse eng infiamna mai pawh hi ka ngaisang ve thung tlat mai a, Sport star chanchin phei chu mi bak bak hian ka lo sawi ve zut zut thin. ‘Vaivawm’ kan tih mai thin Cricket te hi 1999 khan nuam ti em em hian ka lo khel ve tawh a, Test Cricket leh ODI chen hian ka lo tuipui ve em em thin. Thiam phei chu ka thiam hlei law.. Phaia lehkha kan zirlai pawh khan Badminton, TT, Volleyball, Football, Cricket te chen khan ka khel kual vek a, thiante kha chuan ka inkhelh ai chuan a pawn lama lo tang turin min duh zawk thin hial mai thei a ni.
SIHPHIR HI ENG NGE KAN NIH LE ? : Keini ang duang pawh hian kan hriat phak ve chinah reng reng kan khaw thenawm te hian eng infiamnaah mah Sihphir hi min phak ngai lo mai ni lo in min tluk lo hle thin tih kan hrechiang
khawp. A hun lai na na na kha chuan Sihphir infiammi te kha filawr miau hek le. Kan khaw paah hian eng infiamnaah pawh chawimawina dawng tawh hi an tam ngawt hian ka ring a ni. Mahse kha kha chu hun kal tawh a ni thung.
HMAN LEH TUN : Hmanah chuan Sihphir kha Mizoram pumhuap infiamnaah khan kan langsar thin, kha khan chhan a nei. A chhanah chuan khaw dang khan infiam kha an uar ve lutuk lo a ni thei a, khangho lakah khan keini veng kha kan langsar a ni thei. A chhan dang lehah chuan khatihlai khan Mizoram pumpui maiah khan Field/Playground tha tak nei kha an la tlem vang a ni kan ti thei bawk ang. Kan infiammi chawl tawh te kha vengdang mi thiamloh vangin an langsar chu ka ti phal hauh chuang lo. An thiam miau sia. Hun a lo kal leh hret a,
veng hrang hrang leh khaw hrang hrang kha infiamnaah leh infiamna tur Field/Playground tha neih lamah an harh thar ta sup sup mai a. Keini veng kan thang ve tawh si lo, kan field neihchhun kan hman thiam ve hi mi veng lakah chuan “leu set” an tih ang chauh kha a lo ni bawk sia. Mi veng leh khua in tan an han la tak tak a, an practice-na hmunin a lo zir bawk nen, kan hnuaia awm a kan ngaihte khan min lo hnuai en zawk reng tawh mai a lo ni. Keini veng chu hetiang kawngah hian kan thang ve miah lo ni ber hian ka hre thin. Kan veng thalaite zingah hian
infiamna lamah talent nei tha tak tak leh ruihtheih thila fihlim tak tak an tam teh lul nen, heng kan thalaite talent tha tak tak hruaitute leh an aia u te nachang hriatloh vanga pamhmai mai tur hi ka ui a ni kei zawng.
A LA TLAI CHUANG LO E : Sihphir khua hi Mizoram khawlian pawl tak kan ni ve awm e. Job Card pawh 800 chuangin kan nei, mahse Football ground puitling kan la nei lo a, Volleyball Court pawh kan la nei ta chuang hek lo.
Mi vengte an Indoor Stadium-ah an infiam luih luih laiin keini veng chu Community Hall-ah indoor games khel duh kan in ek beng a, ngun taka ngaihtuah chuan a zahthlak zawk zia lah kan hre der lo lehnghal ! Hetiang chung hian kan thalaite Mizoram leh National level-ah a tha pawl an la ni thei ve tho nia !! infiamna hmun tur puitling pakhat mah neilo chung hian. Keichu kan thalai infiam chak lutuk, infiamna tur hmun neilo te hi ka khawngaih. Football leh Volleyball bikah phei chuan an khelh duh chuan kan veng thenawmte khawngaihna dil a ngai hial mai.
KA PU TE U... : Hman ni tlaiah Kawn veng bazar hnunga rem lo leh leng lo chung chung a Volleyball kan benna hmunah MUP Sihphir Unit ten In an lo sa ka hmu a, ka rilru a na leh pek hle mai. ‘Anganwadi centre leh MUP In a lo
ding ang a, a tha tho mai. Heng In pahnih chhawr turte hi kan nau te leh kan pu te ho an nia’ kan ti mai thei. Mahse i ngaihtuah chiang teh ang, he mi hmun lo-ah hian MUP In leh Anganwadi centre dahna tur hmun hi a leng a sin. Amarawhchu heti lai hmun hi Volleyball kan benna hmun reng thin a nia. Volleyball court chu a leng ve dawn tawh lo kum khua ta nih hi. MUP-a ka pu te ho zawng zawng kha hetiang hian kan ngen teh ang che u. Helai hmun hi chu khawngaihtakin in tu leh in fate tan kian hram teh u, hmun dang a la awm em em ang. Hmundangah pawh Inhmun tha tak in neih tawh tho kha maw le.. Nangni zawng thluak daia engkim ngaihtuah thin in nih kha. In tu leh fate’n infiamna tur hmun kan neih loh zia hi min lo dawn pui ve teh u, han kian leh thei hram ula kan va ti em. Kan khawtlang hruaitu te hian pawisa leh thil dangah pawh kan thalaite hi in tanpui fo thin tih kan hria, kan lawm em em rualin mahse a tawk zo lo thin. Football Ground puitling kan neih theih nan pawh hian engkim huam a kan chet a hun tawh tak zet zet a nia. Fur hun chhung zawnga inkhelh theih miah loh te mi veng pa ni se engtin nge an tih ang le? Kan khawtlang hruaitu te leh kan Political Party hruaitu te u, engkim mai hi campaign nan leh kan party tan ti lo hian kan tu leh fa, kan thalaite tan hian hma i la ang u. Chutichuan kan fak ang che u a, kan thlawp bawk ang che u.
Sawrkar Department pakhat phal loh mai mai hlau hlur lovin, kan veng tana tha tur zawk a nih chuan huai tak hian i bei ang u hmiang. Hma inhruai a, kan thalaite tan hma in lak ngam phawt chuan a tawp thlengin kan zui ang che u a, kan fak ang che u, Sihphir thalaite hian. A nih loh chuan in hnung lam mai pawh ni lovin in hmaichhan ah kan nuih sawh ang che u. Theihtawp i chhuah teh ang u hmiang tiin thalaite hian Sihphir mipuite kan ngen a che u.