Zawhfiah theih : Election kaihhnawih chungchanga zawhna zawt duhte tan Toll Free Telephone No. 1950 chu DC Office, Aizawlah dah a ni a. Mi tupawh, zawh duh nei an awm chuan phone man chawi lovin Office hun chhungin
englai pawh a zawhna zawh theih a ni.
Sihphir Bial Meet: Kar kalta ni 3-4 September, 2011 khan Serkhanah Sihphir Bial Mashihi Sangati Area Meet neih a ni a. Speaker atan Rev Darkhuma hman a ni. He meetah hian ringthar 11 in Baptisma an chang. Sihphir atangin Mashihi Sangati Area Zaipawl bakah mi engemaw zat an kal.
Elimination round paltlang: LPS in Comedian Search a buatsaih leh tur atan Vanlalpeka, Taxi Driver, Vengthar chuan Elimination round pal tlangin, TV lamah a hmel kan hmu ve thei dawn ta. Sang tak thleng turin duhsakna kan hlan e.
Ruihhlo man: CADS te chuan ngawrh takin hma an la chhunzawm zel a.Tunkar nilaini khan CADS te chuan Zemabawk Falkland veng inti tlangval 2 hnen atangin parvon spas box 3 ve ve an man sak. Hei bakah Burma
mi pakhat, Zemabawk a mi in a thleng mek inti leh Bawngkawn hmar veng nia inchhal tlangval 1 hnen atangin capsule 412 an man sak bawk. Capsule 1 hi Rs 50/- in an hralh thin. Bawngkawn leh a chheh vel bawr a ruihhlo zuartute hi Sihphir khuaa drugs addict kan neih ho te pawn an zu dawr ber thin te an nih avangin, man fuh an nih hian Sihphir hian a rah kan lo seng zel thin a ni.
Literacy Day: Tunkar ningani khan International Literacy Day a ni a. Mizoramah pawh he ni hi khaw thenkhatah hman a ni. Kum 2011 chhiarpui neih zawh taka a lan danin Mizoramah ziak leh chhiar thiam lo mipa 29425 leh hmeichhia 48461, total 77886 kan awm mek a. Kan Literacy rate chu 91.58% niin, India ramah 3-na kan ni. India ram puma District-ah Serchhip District 1- na an ni a. Aizawl District hi 2-na kan ni. India ram pumah ziak leh chhiar thiam lo kum 7 chung lam mipa 965,68,351 leh hmeichhia 17,6381,664, total 272,950,015 kan awm mek.
Zirtirtu chhuanawm: Kumin Teachers Day lawmna pual khan Govt. Chaltlang Higher Secondary School a Student Union ten an sikul a zirtirtu tha ber thlan nan a hranpa ngat a Ballot Box siamin Secret Ballot in vote an thlak a. An zirtirtu tha ber atana an thlanchhuah, ‘Teacher of the Year’ chu kan Sihphir nu ngei mai Pi Vanhmingliani d/o Zosangliana Tochhong a ni. Pi Vanhmingliani hi a pasal nen he sikulah hian thawk dunin, Chaltlangah hian an cheng mek. A subject lak hi Political Science niin, a subject bikah hian an sikul atangin Zoram pum a mark hmu sang ber pawh an lo awm fo tawh thin.Pi Vanhmingi hi Sihphir Branch YMA hruaitu pawh lo ni reng tawh thin a ni a. Kan lawmpuiin kan chhuang hle.
No comments:
Post a Comment