Savawm no hruaiin seh :

Tunkar thawhtanni khan Tv Lalenkawla s/o Ginzaliana, Tlang veng chu Sehlawh Tuilut ram a an huan bulah Savawm No hruai laiin a seh. Tv Enkawla feh kal hian an huan thlen hma hret a Tuikawng siam hmasak tuma a kal mek laiin tuikhurah hian Savawm no hruai huaisar leh kawlh tak mai a lo awm a. Insaseng hmanna pawh awm lova Savawm hian a lo beih thut avangin a chem phawrh hman mahse chet ngaihna a awm takloh avangin Tv Enkawla hian a hmai lam vengin a hup ta vat a, vanduai rau rauah a vanneih phah ta a ni. Savawm hian Enkawla lu hmun 8-ah leh a dar hmun khatah a seh a. A malpuiah pawh Savawm benna ni awm tak a lang hliam a vung nasa hle.

Tv Enkawla hian a theih tawp a bei let ve reng avangin a tih dan ngailoh ang takin Savawm hi a beidawng nge, a note lamin a rilru an kap lian ta zawk tih pawh hriatlohvin vanneihthlak takin a insaseng san ta hlauh a ni. Hliam tuar chungin Enkawla hian a Cell phone in a chhungte a rawn phone a. YMA lam hriattir an ni nghal a, mipuiah information pek nghal a ni bawk. A hliam tawrhna hmun atang hian thei leh thei lovin engemaw chen amahin a rawn haw a. Mizo tlangval tlawmngai thawk chhuakten kawng lakah zu tawkin, an rawn zawn hawng ta a ni.(Sa leh ral hmaa zam ngai lo, thian chhan thih ngam, khawtlang venghim a nu naute thlamuan thintu kha Mizo Tlangval an ni thin ngai a ni lawmni..?) Tv Enkawl hi Durtlang Damdawi in atangin a lo chhuak tawh a, that lam a pan chho zel.
Amah hi tlangval taima leh huaisen tak mai niin a lang. Helai Tuilut rama an huan, han auh phak mai tur ri hnai pawh awm lemlohnaah hian amah chauh va riah chang pawh a ngah hle (Editor pawh a durlui kal haw lam an thlamah hian a chawl ve reng tawh nghe nghe). Forest Department lam pawhin Tv Enkawla hi an rawn tlawh tawh a. Zangnadawmna hmuh theih dan a awm avangin zangnadawmna pe ngei turin kan beisei pui tlat a ni.