Thalai tam zawk te hi zirlai leh zirna bansan tawh, nu leh pa te chawmhlawm, mamawh engkim nu leh pate hnen atanga dawng kan ni fur awm e. Zirlai ni chiah tawh lo te pawh a tam zawk chu eizawnna mumal em em nei lo, tei rawlai mai mai, nu leh pa thawhchhuah zar a khauphar thawven fe fe, thil changkang leh nalh, tui hre zet si te kan ni.
Chutihrualin zirlai leh zirlai ni chiah tawh lo zingah mahni phak tawk leh tlin ang tawk tawk a chhungkaw tan a mi tangkai nih tum tlat, hunawl neih ang ang pawh chhungkaw tana hmang tangkai thin an awm fur tho bawk. Khawsakna leh nunphung te pawh a hautak tawlh tawlh a. Nu leh pate thawhchhuah ring hian kan thawveng reng thei dawn reng reng lo. Kan duh emaw duh lo emaw, engtik hunah emaw chuan mahni ke a ding turin hun hian min la rawn nangching dawn tho tho va. Kan no reng lovang a, thalai kan ni reng hek lovang. Kan vun te hi a zur dawn a ni. Hetiang mi kan nih dawn vang hian hman deuh mai, thawmhnaw leh taksa tharlam sar, rimtui inhnawih nam chuk thalai teihawi kan tam lutuk te, hma lam hun ngaihtuahna nei lo leh a thawh lam la na lo thalai kan tam lutuk te hi sim a hun e. Chutih karah a thenin ruihhlo ngawl kan lo vei rawl nen. ‘Khaw taima Sihphir khua’ tih thin te kha a thamral tan dawn ta. He kan damchhung hian kan mamawh zawng zawng kan tuak nghah zo kher lovang. Hausak pawh kan hausa kher lovang. Amaherawhchu Pathianin chhia leh tha hriatna leh chakna min pek hmang hian a then a zar tal tuakchhuak thei tur leh chhungkaw tana tangkaina nei thei turin taihmak kan chhuah a, kan insingsak a hun ta.
Sihphir thalai zingah a bul thut dik loh avanga khawlai a zu zawrh zak lo, ruihhlo atanga sum lak luhna dap kan tam sawt em em mai te hi a pawi a ni. Tun hun atanga kan insiam fel vat loh chuan THALAI ZU ZUAR hi kan pung tawlh tawlh dawn. A bul thut atanga to dik turin chhungkua, Kohhran leh khawtlang kan harh thar a, kan tanrual a va ngai nasa tehlul em !!
No comments:
Post a Comment