Pawngsual chungchang review

Mi thenkhatin pawngsual chungchang kha a chin chhuak deuh hlek a chhui a, rawn tarlang leh tur a min ngenna angin, a theih ang ang a kan han chian kual velna leh a behbawm dang thenkhat kan han tarlang dawn a ni. He pawngsualna nunrawng tak mai tawktu te chhungkua hi Durtlang Zion veng (Durtlang field chung a veng) a khawsa, harsa ve tak an ni a. An pa hi hmun hran hran a lehkhabu zuar a vak kual vel thin niin, Sihphir khuaah pawh a rawn zuar fo va, pawngsual tawktu a fanu pawh hi rawn hruai chang a nei thin. Vanduaina an tawh tlai hian hmeichhe naupang unau te hi an nu in Durtlang dawrkawnah buhfai lei turin a tir a. Laldinthara hi Durtlang damdawi In kawng tepen lam atanga Taxi a lo tlan thla-in, Durtlang field peng bul a naupang pahnih kawng kal mek te bulah hian a ding a. Chuan man pawh ngai lova chuang ve tura a sawmna chu anni naupang a thukhawchang, an chuang ve mai a. Dawrkawn an thlen hian Taxi Driver hian an in lamah a kal tlang lawk dawn thu leh, chuang tlang ve a, haw lam a buhfai lei mai turin a sawm a. Hmeichhe naupang te pawh hian ngaihthat lohna engmah nei lovin an aw ve mai ni awm tak a ni. Selesih lamah a rawn tlan tlangpui ta a. Selesih kawn an rawn thlen hian hmeichhe naupang pahnih hi an mangangin, an zam hle tawh a. An buhfai leina tur, an nu-in Rs 100/ - a ken tir chu pek a, chhuk tir turin Taxi Driver nunrawng tak mai hi an ngen nasa hle. He pa hian an au vaih chuan thah dunah a vau bet ta a. Kum 7 leh kum 9, an kum phu lova taksa thangduang pawh ni lo, chawrche ve tak te hi he mi nunrawngpa hian Rescue Centre kawng lamah a rawn phur lut lui ta a nih chu !! Rescue centre kawng hi a tha vak lova. Tlan tlang luih a tum thawm pawh a tha ham ham viau a niang, hemi ni a tlaklam tuikhur mawng a feh Pu R Zothansiama, Biak In veng pawhin motor thawm hi lo hria-in, “An va han pawimawh awm em em ve aw ka lo ti hial a ni” a ti. He misual hian Upa Tana (L) farm peng thlen hma metal road chinah motor hi ti dingin motor chhungah a pawngsual a. Hemi hnu hian pawn lamah a pawngsual leh bawk. A u a pawngsual lai hian a nau hi an bulah a awm luih tir thin. Hemi bul lawk a mi bekte zarah hruai luih a tum a, naupangte hi an tang chuan thahah a vau zel bawk si a ni. Helai ram vel hi nidangah chuan a rak hle a, hemi ni ber kher hian ruah sur nen, mi an reh hle a, an vanduai chungchuang hle. Pitar pakhat feh haw an hmu a, a chhan ngam an rin loh avangin an au ngam lova. Hemi hnu lawk hian Pu Ralthuama, Tamlo veng te nupa feh haw lo lang lehin, naupangte hi an au chhuak ta a. Pu Ralthuama te nupa hian naupang hlau thlabar au ri an hriat hian an phur an nghat sawk sawk a. Chutih mek laiin naupang pahnih, pakhat zawk kekawr ha lo, hlau khur zawih zawih an lam pan a lo tlan an hmu a. Pawngsual tawk zawk hian Pu Ralthuama nupui hi hlau khur zawih zawih chungin a rawn pawm bet nghal a, cheng za pawh a la hum tat nghe nghe. Pu Ralthuama te hian hemi bul lawk leipui a hnathawk mek Pi Chawngziki te an au nghal. Misualpa hi ngemaw chen a Taxi bulah hian a din hnuah chhak lam panin a tlanchhe chho ta a. Pu Ralthuama hian chem tum nen a um zui nghal bawk. A sawi danin a thin rim lutuk a, umpha ngat se chu a sat nasa viau awm e. Pi Chawngziki leh a vahnu an lo thlen hian a vahnu pawhin chemkawi nen he mi sualpa hi thui tak a han um ve nghal bawk. “Kan thin a rim lutuk a, engmah hlauh kan hre tawh lo” an ti. Pi Chawngziki hian fing takin in lama a fapa Zoramchhana a han phone vat a. He misual thawmhnaw hak leh a tlan chhiatna lam pawh a hrilh nghal. Chumi hnuah VDP hruaitute pawh a phone zui nghal a, VDP lamin YMA lam an phone veleh a. Phone dawng hmasa VDP hruaitute hi ruahsur hnuaiah rang takin a hmun an thleng thla nghal a ni. Khawchhung lamah inhrilh darh zel a ni bawk a. He misualpa hi zawn thlak nghal pahin a tlanchhuah theihna tur khan zawng zawngah chan nghal a ni. Man fuh a nih takna chhan hi a vanneihthlak hle. Pi Chawngziki fapa Zoramchhana leh a thianpa hian thlanmual thar an kal mek laiin Sunhlu tlang a thil phe zeuh an hmuh chu an ringhlel a. Pu Bawihchhunga (L) In bulah rawn tlan let leh nghalin, a nu-in a rawn hrilh ang thawmhnaw ha, Pu Ngurdawla In bul a rawn chhuk thla mek chu an han man bet ta a ni. Hepa thawmhnaw hak hi tuman an hriat ve loh avangin tlem a tlemah a rawn bi bo hman tep a ni e. A mantute sawi danin misual pa hian khur zawih zawih chungin kut thlak lo tur leh Police a pe zawk turin a ngen nasa hle. A tirah tak chuan he misualpa hi Hall-ah dah tum a ni a. Ngun zawk a an ngaihtuah hnuah kan hruaituten mipui thinrim inven zawh loh hlauh vangin Pu HV Lalmalsawma, VCM inhnuaiah an dah ta zawk a ni. Chibaitu erawh a tawng ta nual tho. A hnu lamah khan kir leh ta ila. He thil thlen lai hian nasa takin ruah a sur kan tih tawh kha. Pu Ralthuama nupui hian thelret puanin hmeichhe naupang thlabar, khur zawih zawih leh huh zawr vek bawk si hi tuamin a pawm nghal a, Pi Chawngziki nen an thlamuan nghal mawlh mawlh bawk. Tichuan a thleng hmasa te zing a mi Pu Sangzuala leh Pu H Laltanpuia ten rawn paw chhovin Pu C Lalsangzuala Inah luh pui a ni a. A buaipui tur hian thenawm nuho an tlan lut nghal bawk. Thawmhnaw pawh hak sen loh an rawn vawm lut nghal a ni. Hmeichhe naupang serh hi a hliam nat em avangin a kekawr hak chhanah pawh thisen a chhuak rei hle. (Tun thlengin zun leh ek a la thiar tha hlei thei lo) An unau hian thawmhnaw lum te hak tirin, chaw te ei puar tir an ni a. Durtlang lamin an rawn hruai phei ta a ni. Hemi zan hian pawngsualtu leh a pawngsual a hi medical check up/ HIV Test neih sak nghal vek an ni a, HIV/AIDS lakah an normal. He naupang vanduai leh khawngaihthlak avang hian lainattute mittui a luangchhuak hnem hle. He vanduaina kan lo buaipui danah Durtlang mipuite hi Sihphir khawtlang chungah an lawm tak meuh meuh bawk. Khami tlai khan melkaw chho-ah kawng chhe lovin, Durtlang lam hi rawn thleng chho thei ta ngat se he misualpa hi damin a chhuah a rinawm loh. Police kuta a awm hnuah pawh an chil hlum tep reng a ni. Tun thleng a mite thinlung a zawhna thi thei lo chu “Man ni ta lo se heng unau pahnih te hi a that mai a ngem?  tih hi a ni. Heng naupang khawngaihthlak tak te hma lam nun tur hi ngaihtuahawm tak a ni ta bawk. A tawp ber atan chuan kan hruaitute thu leh hla kan zah der leh kan pawisa thin hi a lawmawm tak meuh meuh a. Kan chin chhoh zel atana thil duhawm tawp a ni. Tin, nu leh pate hian kan fate hi i fuih reng bawk ang u. Hei bakah kan vengchhung atang hian nitin Aizawl lam a Sikul kal etc. thahnem tak kan awm mek a. Kan fimkhur thar a ngai hle. Hmelhriat ngai loh lakah ngat phei chuan fimkhur a ngai zual tak meuh meuh a ni.