I la inchhir ang

 Black Sabath zai puipu ni thin Ozzy Osbourne-a’n  a thil tawn hrang hrang atanga midangten zirlai pawimawh an zir theih nan tia a ziahah a fanu in Tattoo (vun a thil lem ziah) a ngaina lutuk chuan a rilru a tihah thin hle a ni a ti. “Ka fanu in Tattoo chhut a duh thu a sawi hmasak ber kha ka la hre reng a, “Ka hnen atang hian inzir rawh, nakinah i la inchhir nasa dawn a nia aw”, ka ti a. Luhlul a chhuah a, tunah ka fanu inchhir hian van a tawng tawh”, a ti.
    A tirah chuan a hlimawm a, a nuam hle thin. Kum a upat meuh chuan mahni kan inzah pui ngawih ngawih tawh a, midang hmuh loh turin rem leh rem lovin kan inhliah buai reng a, hahthlak tak a ni. Khatiang ka lo ti ve mai kha aw !! tih loh tur thil a nih teh reng tiin ka phun ka phun tawh mai a ni a ti.
    Kan veng thalai zingah Tattoo lo inchhut tir ve mai te, tattoo neih ve chak em em mai te kan awm  ta nual mai !! Tattoo nei reng reng chu Sipaiah an la ngai lo phawt. Hna zahawm thawk turin an hnualsual nghal.  Damchhungin taksaah a awm tawh dawn a. Nawhreh duh pawhin laser surgery hmang a zai a ngai a, a zai man a to em em bakah vun pangngai ang a pu thei tawh chuang hek lo.
     A harhchhuah hma a Satanic tak mai Ozzy te meuh  pawhin an inchhir em em a nih lai hian, nang phei chu sawi hian a siak lo ve. Sorkar hnathawk, Kohhran rawngbawltu, etc. ni ta la, Tattoo nen khan i inhmeh a ngem ? Tin, hriau hmang a chhut kai a nih avangin natna tha lo kai palh a hlauhawm em em bawk. Tattoo neih hi i la chak zui zel dawn em ? i career-ah harsatna namen lo thlen theitu tur che a ni.